“Ыһыах-үтүө үгэс, кэрэ кэскил!”самаан сайыны уруйдуу үрүҥ тунах ыһыах Баатаҕай нэһилиэгэр.
Бэс ыйын 18 күнүгэр Өрөспүүбүлүкэҕэ Үлэ, Уус-Алдан улууһугар Инфраструктура, нэһилиэккэ Спорт уонна маассабай хамсааһын сылларынан, Баатаҕай нэһилиэгэр ыһыах түһүлгэтин хонуутугар бары бииргэ мустаммыт, үтүө үгэспитин тутуhан түhүлгэни олохтоотубут, түптэ буруотун унаарыттыбыт, кэҥэрдии сытын таhаардыбыт, салама баайыы сиэрин-туомун толорон доҕордоһуу саламатын баайдыбыт.
Саргылаах ыhыахпыт үөрүүлээх арыллыытын түстэhэ алгыс сиэрин-туомун биир дойдулаахпыт, Саха Республикатын культуратын туйгуна, Дүпсүн нэһилиэгин бочуоттаах олохтооҕо Босикова Ульяна Ильинична алгыһыгар олорсон түһүлгэҕэ киирбит бар дьоммут дьолу-саргыны, үтүө күүстэри көрдөстүлэр.
«Ыһыах-үтүө үгэс, кэрэ кэскил!” Баатаҕай нэһилиэгин ыһыаҕар мааны ыалдьыт буолан кыттыыны ыллылар Бочкарев Степан Николаевич, Уус-Алдан улууһун тыа хаһаайыстыбатын управлениетын начальнига, биир дойдулаахпыт, улуус депутата Троев Алексей Яковлевич. Нэһилиэк баһылыга Михаил Михайлович, ыкса үлэлэһэр Алексей Яковлевич кэлэр сылга биир дойдулаахпыт, Саха сиригэр спорт уһулуччулаах салайааччыта, тѳрүттээччитэ, государственнай деятель Н.Н. Тарскай тѳрѳѳбүтэ 100 сылын кѳрсѳ былааннаммыт үлэлэри бары бииргэ сүбэлэһэн, тэрээһиннээхтик ыытарга ыҥырдылар.
Үөрүүлээх чааска нэһилиэкпит олохтоохторо, биир дойдулаахтарбыт нэһилиэк, улуус баһылыктарын, улуус дьокутааттарын сэбиэтин бэрэссэдээтэлин уонна тыа хаһаайыстыбатын управлениятын анал бэлиэлэринэн, грамоталарынан, махтал суруктарынан наҕараадаланнылар.
Ыһыах культурнай, спортивнай курэхтэр ѳрѳ күүрүүлээхтик ыытыллыннылар. Спортивнай күрэхтэргэ Дүпсүн, Найахы уонна Суотту нэһилиэктэриттэн кэлбит ыалдьыттар олохтоох, дойдулаах уолаттары кытта күѳн кѳрсүһэн кѳрѳѳччүлэри сэргэхситтилэр.
Биир дойдулаахпыт, улуус депутата Алексей Яковлевич кѳҕүлээһининэн Дьокуускай куораттан кэлбит ырыаһыттар Василий Новоприезжий, KYN SOL, DJ KRT, Кэскил Баишев уонна ыытааччы Дмитрий Баишев ыһыахпытын киэргэттилэр.
Бу кэнниттэн, «Үтүѳ санаа оонньуута – Ѳрѳгѳй» розыгрыш оонньонно. Сүрүн бирииһи Елизавета Петровна Сивцева сүүйэн розыгрыш олохтооччутуттан Троев Алексей Яковлевич илиититтэн мотоцикл күлүүһүн тутта.
Санатан эттэххэ, розыгрыш киирбит үбэ-харчыта Айыы балаҕана сѳргүтүллэн үлэҕэ киирэригэр ананар.
Бэлэмнээтэ Сивцева В.П.
