Бу күн эбэҕэ киириэх иннинэ өр сылларга муҥха салайааччыта Николай Федоров аал уотун оттон алгыс тылын эттэ, нэһилиэк баһылыга Михаил Белолюбскай кэлэн иһэр бырааһынньыгынан эҕэрдэлээтэ, далбар хотуттар алаадьынан айах тутан, миин буһаран, итии чэй оргутан күндүлээтилэр. С.Ф.Сивцев аатынан “Түмэн” норуот айымньытын киинэ аҕаларга анаан күрэстэри ыытта. Түмүккэ оонньууларга “Сүгэ быраҕыыга” Руслан Кузьмин, “Корнхолга” Василий Сивцев, “Чуукка быраҕыыга” Андрей Карпов кыайыылаах буолан грамотанан, мэтээлинэн уонна өйдөбүнньүк бирииһинэн наҕараадаланнылар.
«Движение первых» оҕо хамсааһынын (сал. Сидорова Н.Н.) үөрэнээччилэрэ эһэлэри, аҕалары батыһа сылдьан муҥха туһунан билистилэр, бииргэ үлэлээтилэр. Ити курдук сүүсчэкэ киһи кыттыһан саха төрүт дьарыгын ɵрɵ тутта, Күөх Боллох көмүс хатырыктааҕыттан бэрсэн үөрэн-көтөн тарҕастылар.
