Декада устата нэһилиэкпитигэр араас хабааннаах тэрээһиннэр ыытылыннылар.
Ол курдук, «Мир моих увлечений» коллекционардар, «Тэлгэһэм сибэккилэрэ», «Мин оҕуруотум aha» хаартысканан быыстапкалар алтынньы 6 күнүттэн 10 күнүгэр диэри норуот айымньытын киинигэр турда. Быыстапканы нэһилиэк олохтоохторо, оҕо уһуйаанын иитиллээччилэрэ, орто оскуола алын сүһүөх үөрэнээччилэрэ анаан кэлэн экскурсиялаатылар.
М.К. Федорова аатынан олохтоох библиотека «В гармонии с возрастом» кинигэнэн быыстапка туруорда
Алтынньы 9 күнүгэр С.Ф. Сивцев аатынан “Түмэн” норуот айымньытын киинигэр аҕам саастаахтарга анаан цифровой грамотности үөрэх, мас билиэтин отчуотун оҥорууга, Госуслуга, ДЭК, курдук электроннай өҥөлөргө көмөлөрү Пермякова А.П., Федорова С.Н., Белолюбскай А.П. оҥордулар.
Н.Н. Тарскай орто оскуолата, “Күнчээн” оҕо уһуйаанын коллективтара бэтэрээннэригэр анаан төгүрүк остуоллары, көрсүһүүлэри тэрийдилэр.
Оскуола оҕолоругар «Я и мой дедушка, бабушка» хаартыска-акция ыытылынна.
Бу күн «Здоровье — твое богатство» акцияны фельдшерскай пуун тэрийэн ыытта. Манна элбэх киһи кэлэн доруобуйаларын көрдөрдүлэр, грипп, ОРВИ кэмигэр бэйэни харыстанар сүбэлэри иһиттилэр.
Аҕам саастаах дьоммут бу үлэ сезонугар бастакы маскировочной сетканы баайан саҕалаатылар.
«Үтүө санаанан» акцияҕа – аҕам саастаах дьоммут көрдөһүүлэринэн сыһыарыылаах тэрилтэлэр тахсан көмөлөстүлэр
Декада түмүктүүр тэрээһинэ “Сырдык Аартык” ыччат түмсүүтэ бэлэмнээбит минньигэс астаах, итии чэйдээх остуолун тула олорон бэрт сэргэхтик буолан ааста.
Үөрүүлээх чааска нэһилиэк баһылыга М.М. Белолюбскай СВО кыттыылааҕын ийэтигэр Березкина А.Н анал мэтээли, «Единая Россия» партия дойду үрдүнэн оскуола иннинээҕи үөрэхтээһин тэрилтэлэрин күнүнэн эҕэрдэ суругу Босикова Т.И туттарда, социальнай харысхал управлениетын аатыттан А.И. Белолюбская Константинова У. Г юбилейынан уонна декаданан ыыппыт Эҕэрдэ Суругун туттарда. Ыччаттар ааттарыттан Алена Готовцева эҕэрдэлээтэ, открыткалары туттардылар, Анна Босикова ылбаҕай ырыатын бэлэхтээтэ. Быыстапкаларга кыттыбыт аҕам саастаахтарга хас биирдиилэригэр норуот айымньытын киинин директора Л.Р. Готовцева эҕэрдэлээн туран махтал суруктары туттарда.
«Чэйиҥ эрэ, Эбээлэр» биэс түһүмэхтээх күрэххэ Антонина Белолюбская, Наталья Готовцева оҥостон, бэлэмнэнэн округтарын аатыттан кытыннылар. Түмүккэ бастакы миэстэни Н.В. Готовцева, иккис миэстэни А.И. Белолюбская ылла. Дьүүллүүр сүбэҕэ нэһилиэк депутата, библиотекарь Августина Пермякова, эдэр учууталлар Александра Аммосова, Алена Готовцева үлэлээтилэр. Кыйыылаахтарга грамоталары, сэмэй бэлэхтэри туттардылар.
Кэлбит дьон астына сынньанан, сэргэхсийэн, махтанан бардылар. Тэрийээччилэр аатыттан декада устата тэрээһиннэргэ кыттыбыт аҕам саастаах ыраах, чугас олорор нэһилиэкпит олохтоохторугар махталбытын тириэрдэбит. Бу курдук үөрэ- көтө, олохтон дуоһуйа, астына сылдьаргытыгар. Кырдьыы кыттыспатын, ыарыы ыалласпатын, чугас дьоҥҥут тапталларыгар бигэнэн уһун үйэлэнин диэн алгыс тыллары анаатахпыт буоллун.
