Быйыл 13 төгүлүн ыытыллар Республиканскай «Олоҥхо ыһыаҕа» Нам улууһун сиригэр-уотугар 3 күн устата буолла. Баатаҕай нэһилиэгиттэн бөлөҕүнэн олоҥхону толорууга «Кылыһах» бөлөх баран ситииһиилээхтик кыттан «Кылыгырас кылыһахтаах-дуорайар тойуктаах» анал аат хаһаайыттара буоллулар. «Дьырыбына Дьырылыатта Кыыс Бухатыыр» күрэххэ биһиги кыыспыт Евгения Гоголева 3 таһым «Уйуллаана Куо» анал аат хаһаайкатынан буолла.  

«Түһүлгэлээн түмсэбит, төлкөбүтүн түстүүбүт!» олоҥхоһут Прокопий Наумович Соловьев — Намыын төрөөбүтэ 125 сылыгар аналлаах улуустааҕы ОЛОҤХО ЫҺЫАҔА Баатаҕай сиригэр-уотугар үрдүк таһымнаахтык ыытылынна. Олоҥхону биирдиилээн, бөлөҕүнэн, аймаҕынан толорууга Уус-Алдан улууһун таһынан Тааттаттан, Мэҥэ-Хаҥаластан, Горнайтан, АГИиК устудьуоннара кэлэн кыттыыны ыллылар. Нэһилиэкпит биллиилээх дьоннорун ааттарыгар араас конкурустар буоллулар, кыайыылаахтарга убаһа уонна да араас сыаналаах бириистэр туттарылыннылар.

Бэс ыйын 7 күнүгэр Улуустааҕы олоҥхо ыһыаҕын 1-кы күнүгэр Прокопий Наумович Соловьев «Күн Ньургун» олоҥхотун кинигэтэ сүрэхтэннэ. Кинигэни «Кылыһах» оҕо фольклорнай образцовай студиятын бастыҥ иитиллээччитэ, билигин АГИиК преподавателэ Зоя Андреевна Стрекаловская таһаарда.

Олоҥхону толорооччу Афанасий Петрович Бурцев — Бөскөй Бөҕө Баатаҕай нэһилиэгэр айаннаан кэллэ. Норуот тылынан уус-уран айымньытын тарҕатар сыаллаах «Аартыктарынан айан» суола улууспут нэһилиэктэринэн айаннаан бүгүн «Түһүлгэлээн түмсэбит, төлкөбүтүн түстүүбүт!» олоҥхоһут Прокопий Наумович Соловьев — Намыын төрөөбүтэ 125 сылыгар аналлаах улуустааҕы «Олоҥхо ыһыаҕын» көрсө айаннаан кэллэ.