Нэһилиэк олохтоохторо бэлиэ күнү сахалыы сайбаччы таҥнан үөрэ-көтө бэлиэтээтибит.
Тэрээһини Саха Республикатын өрөгөй ырыатынан, Күндэ «Төрөөбүт тыл» хоһоонун күргүөмүнэн ааҕан, 5 кылаас үөрэнээччитэ Сайыына Белолюбская чабырҕаҕынан эҕэрдэлээн арыйдыбыт.
Ол кэннэ олохтоохтор биирдиилээн БАСТЫЫР иһин
«Хомуур күрэххэ»
«Уһун тылтан элбэх тыл»
«Ыраас, бастыҥ буочар» оонньууларга көхтөөхтүк кытыннылар. Түмүккэ Хомуур оонньууга Вера Белолюбская, бастыҥ буочардаах Сардаана Ядрихинская, уһун тылтан элбэх тылы билиигэ Людмила Готовцева кыайыылаахтарынан буоллулар.
Салгыы Түөлбэнэн «БУЛУГАС ӨЙ КҮРЭҺЭ» оонньууну олохтоох библиотека сэбиэдиссэйэ Августина Пермякова ыытта. Биэс араас көрдөөх, көхтөөх, толкуйдатар түһүмэхтээх оонньуу муҥутуур кыайыылаахтара «Сарыал» түөлбэ, иккискэ «Аргыс» түөлбэ, үһүс миэстэҕэ «Дабаан» хомуур хамаандата буоллулар. Бэлиэ күн бары кыайыылаахтарыгар хайҕал суруктар, сэмэй бэлэхтэр туттарылыннылар.
Быыһыгар хабылык, хаамыска, иэрэгэй, тырыынка оонньоон тарҕастыбыт.
