С. Ф. Сивцев аатынан «Түмэн» норуот айымньытын киинигэр «100 сыл кэрэни, сырдыгы саҕан» үөрүүлээх тэрээһин үгүс дьону түмтэ, кэнчээри ыччакка история кэрдиис кэмин сырдатта. Нэһилиэк олохтоохторо «Ааҕар балаҕантан саҕыллан куйаар ситимигэр» кинигэ быыстапкатын сэргии, сэҥээрэ иһиттилэр. Фойеҕа олохтоох библиотека историятын сырдатар хаартысканан, библиотека иһинэн үлэлиир «Эйгэ» түмсүү чилиэттэрин айар үлэлэрин, уус-уран оҥоһуктарын көрдөрөр быыстапка, оҕо эрдэхтэн сөбүлээн ааҕар саха суруйааччыларын бастыҥ айымньыларын ааттарынан фотозона турда, мустубут дьон сэҥээриитин ылла. Тэрээһини Н.Н. Тарскай аатынан Баатаҕай орто оскуолатын «Уолан» уолаттар кыра бөлөҕө төрөөбүт Баатаҕайдарын туһунан монтаж ааҕыытынан арыйдылар.
Бэлиэ күҥҥэ нэһилиэк аҕа баһылыга ММ Белолюбскай, улуус кииннэммит библиотекатын тиһигин директора ИД Копырин истиҥ эҕэрдэлэриттэн саҕаланна. Ол курдук библиотеканы кытта ыкса ситимнээхтик улэлэһэр тэрилтэлэргэ — «Баатаҕай нэһилиэгэ» МТ дьаһалтатын, «Түмэн» НАК, Н.Н. Тарскай аатынан Баатаҕай орто оскуолатын, «Күнчээн» оҕо уһуйаанын коллективтарыгар, библиотека үлэтигэр өрүү көмөлөһөр, сирдиир сүбэһиттэргэ Троева ВИ, Румянцева КИ, Готовцева НВ, бастыҥ ааҕар Корниловтар дьиэ кэргэҥҥэ, бастыҥ ааҕааччыларга махтал суруктары, өйдөбүнньүк кинигэлэри туттардыбыт. Дьоро күнү ылбаҕай ырыаларынан МВД майора, сцена ветерана МС Ушницкая, библиотека үлэһиттэрэ МН Гоголева, МП Заболоцкая, «Эрэл» үҥкүү бөлөҕө киэргэттилэр. Тэрээһини киин библиотека специалистара иилээн-саҕалаан ыыттылар, олохтоохтор биһирэбиллэрин, сонун тэрээһин буолбутун бэлиэтээтилэр. Нэһилиэк салалтата кэлбит ыалдьыттарга быйылгы дьылга үбүлүөйдээх биир дойдулаахпыт НН Тарскай значоктарын, кини мэтириэттээх блокнот уонна уручуука бэлэх уунна.
Түмүктүөх иннинэ, бииргэ үлэлэһэр нэһилиэгим тэрилтэлэригэр, ааҕааччыларбар, «Эйгэ» түмсүүм кыргыттарыгар, учууталларбытыгар, үөрэнээччилэрбитигэр улахан махталбын биллэрэбин. Өрүү көхтөөх, бэйэ-бэйэни өйөһөн, түмсүүлээхтик үлэлиэххэ-хамсыахха. Чэгиэн сылдьыҥ, чөл буолуҥ!
Августина Пермякова, МК Федорова аатынан Баатаҕай библиотекатын сэб







































