Быйыл «Георгиевскай лента» акция «Н.Н.Тарскай аатынан Баатаҕай орто оскуола» «Кэскил» оҕо түмсүүтүн кытта холбоон ыыттылынна. 8-11 кылаас үөрэнээччилэрэ сэрии кэмин оҕолоругар уонна нэһилиэкпит олохтоохторугар кэлэн иһэр Улуу Кыайыы күнүнэн эҕэрдэлээн туран лента түҥэттилэр. Ону таһынан үөрэнээччилэр ортолоругар «Окна Победы» акция ыытылынна. Уопсайа 21 оҕо кыттыыны ылла.
Киэһэ Кыайыы Болуоссатыгар сэрии толоонугар охтубут буойуттары кэриэстиир чүмэчи ууруутугар муһуннубут. Ыччаттар «Махтал эйиэхэ, бэтэрээҥҥэ!» монтаж ааҕан уонна П.Одорусов тылларыгар «Ветераннар» диэн ырыаны ыллаан иһитиннэрдилэр. Сэрии ыар сылларыгар Сахабыт сирэ, улууспут, нэһилиэкпит олоҕун, хорсун буойуттарбыт туһунан кэлэр көлүөнэҕэ сырдатан нэһилиэк баһылыга М.М.Белолюбскай, нэһилиэк баһылыгын солбуйааччы В.П.Сивцева тыл эттилэр. Орто оскуола 7 уонна 8 кылааһын үөрэнээччилэрэ Н.Н.Тарскай сөбүлүүр ырыатын — «Три танкиста» толорон киэһэни киэргэттилэр.
Бу сылга нэһилиэкпит олохтоохторун кытары *78* сыыппараны таһаардыбыт.
Сэрии хонуутугар Аҕа дойдуларын туһугар охсуспут, тыылга хаалбыт оҕонньор – эмээхсин, дьахтар, оҕо – аймах эйэлээх олохтон маппыт сор – муҥ сылларын биһиги, кэлэр көлүөнэ ыччата, үйэтитэр ытык иэстээхпит!»
Иһитиннэриини бэлэмнээтэ Галактионова М.И.
