ЦНТ "Тумэн"

ЦНТ "Тумэн"

МУНИЦИПАЛЬНОЕ БЮДЖЕТНОЕ УЧРЕЖДЕНИЕ «БАТАГАЙСКИЙ ЦЕНТР НАРОДНОГО ТВОРЧЕСТВА «ТУМЭН» ИМЕНИ СЕМЕНА ФЕДОРОВИЧА СИВЦЕВА» МУНИЦИПАЛЬНОГО ОБРАЗОВАНИЯ «БАТАГАЙСКИЙ НАСЛЕГ» УСТЬ-АЛДАНСКОГО УЛУСА (РАЙОНА) РЕСПУБЛИКИ САХА (ЯКУТИЯ)

Муус устар 27 күнэ

Саха автономията тэриллибитэ 100 сылыгар, олохтоох бэйэни салайыынытын күннэригэр аналлаах Баатаҕай нэһилиэгэр биллэриллибит декада чэрчитинэн ыытыллыбыт тэрээһиннэр туһунан иһитиннэрии:
Муус устар 20 күнүгэр чөл олоҕу тутуһар нэһилиэк олохтоохторо, 100 км. «Хаалыктаах хаамыы» челленджка кыттыстылар.
Муус устар 21 күнүгэр Баатаҕай нэһилиэгин баһылыга коллегаларын, нэһилиэк депутаттарын уонна олохтоох бэйэни салайыныы сайдыытыгар үлэлэспит, тус кылааттарын киллэрсибит ветеран үлэһиттэрин, муниципальнай сулууспа ветеранын куйаар ситимин нөҥүө эҕэрдэтэлээтэ.
Муус устар 22 күнүгэр М.К. Федорова аатынан олохтоох библиотека сэбиэдиссэйэ Пермякова А.П. олохтоох бэйэни салайыныыга, автономия тэриллибитэ 100 сылыгар аналлаах медиа уруоктары оскуола оҕолоругар ыытта.
Муус устар 25 күнүгэр олохтоох бэйэни салайыныы дьаьалтатын тэрилтэлэрин үлэһиттэрэ, нэһилиэк дьокутааттара сахалыы таҥастаах үгэс буолбут мунньахтарын ыыттылар, нэһилиэк олохтоохторугар Сахабыт сирэ үбүлүөйдээх күнунэн эҕэрдэлэрин тиэртилэр.
Муус устар 26 күнүгэр Баатаҕай нэһилиэгин олохтоохторугар улууспут тэрилтэлэрин специалистара аһаҕас күн оҥордулар. Ол курдук, Уус-Алдан улууһун социальнай көмүскэлгэ управлениетын специалиһэ Матвеева Вера Васильевна, Уус-Алдан оройуонун нэһилиэнньэ дьарыктаах буолуу киинин специалиһэ Ноговицына Матрена Петровна, «Мин дөкүмүөннэрим» государственнай уонна муниципальнай өҥөнү оҥорор киинин специалиһэ Тарская Саскылана Сергеевна, Уус-Алданнааҕы дьиэ-уот коммунальнай өҥө услугатыгар социальнай көмө онорор тэрилтэ салайааччыта Петрова Екатерина Ивановна Уус-Алданнааҕы биэнсийэ пуондатын салайааччыта Белолюбскай Руслан Матвеевич кэлэн үлэлээтилэр. Руслан Матвеевич тэрилтэ салайааччыларыгар, олохтоохторго сокуоҥҥа киирбит уларыйыылары, биэнсийэ ааҕыллыытын туһунан кэпсээтэ, киирбит ыйытыыларга сиһилии хоруйдаата. Уопсайа 55 киһи тустаах өҥөнү туһаннылар, учуокка турдулар.
Бу күн биир дойдулаахтарбыт: Уус-Алдан улууһун Сэбиэтин дьокутаата Готовцев Николай Николаевич уонна Уус-Алданнааҕы үп управлениетын салайааччытын эбээһинэһин толорооччу Кузьмина Туяра Михайловна. Балаҕан ыйыгар буолар быыбар үлэтин, иннибитигэр турар былааннары Баатаҕай нэһилиэгин дьокутааттарын кытта ырытыстылар.


Улууспутугар бара турар үлэлэр, чуолаан Саха сирин норуоттарын VIII- с спортивнай оонньууларга бэлэмнэнии, тэрээһиннэр хаамыыларын туһунан информацияны иһитиннэрдилэр, олохтоохтор ыйытыыларыгар хоруйдаатылар. Түгэнинэн туһанан, Саха автономията тэриллибитэ 100 сыллаах үбүлүөйүнэн уонна бэйэни салайыныы күнүнэн эҕэрдэлээн туран, нэһилиэк баһылыгар М.М. Белолюбскайга Уус-Алдан улууһун баһылыгын А.В. Федотов, Сэбиэтин бэрэссэдээтэлин И.И. Колодезников эҕэрдэ суругун, баһылык солбуйааччытыгап В.П. Сивцеваҕа бочуотунай грамота уонна нэһилиэк дьокутаатыгар Е.Д. Захароваҕа махтал сурук туттардылар.
Муус устар 27 күнүгэр Баатаҕай нэһилиэгэр Саха Республикатын 100 сыллаах үбүлүөйдээх күнүн көрсө 100 киһилээх тэрээһин ыытылынна. Нэһилиэк олохтоохторун, биир дойдулаахтарбытын кэрэ-бэлиэ күнүнэн эҕэрдэ радио-концерт, улуус, нэһилиэк баһылыктарын эҕэрдэтэ, Саха республикатын, Уус-Алдан улууһун нэһилиэкпит 100 сыллаах историятын, ситиһиилэрин сиһилии билиһиннэрэр радиорепортаж иһилиннэ.
Бу ураты күн оҕолорго «Өбүгэ ситимэ», түөлбэлэринэн «Саха мааны таҥаһа» дьиэ-кэргэнинэн куонкурустар ыытылыннылар. Уопсайа уон ыал саха таҥаһын толору, аныгылыы кэтэн дьүүллүүр сүбэ көрүүтүгэр таһаардылар. Саха норуотун ыллыктаах историятын кэпсиир, көрдөрөр араас кэминээҕи туттар малы 19 үөрэнээччи быыстапката сөхтөрдө. Нэһилиэк түөлбэлэрин олохтоохторо саха таҥаһын таҥнан, өрө күүрүүлээхтик парадтаан киирэн Саха республикатын гимнын толордулар. Нэһилиэк баһылыга М.М. Белолюбскай кэккэ сыл устата дьон-сэргэ көҕүлээһиннэринэн олоххо киирбит бырайыактары билиһиннэрдэ, 100 сыллаах үбүлүөйдээх анал бэлиэлэри туттарда. Аҕа баһылык эҕэрдэтигэр кыттыһан: көлүөнэлэр үҥкүүлэрэ үҥкүүлэннэ, оҕо уһуйаанын иитиллээччилэрэ «Мин саха буолабын» (сал. Готовцева С.И.), нэһилиэк олохтооҕо Марта Ушницкая «Кыталыктар» ырыалары ыллаатылар. Н.Н. Тарскай аатынан Баатаҕай орто оскуолатын үөрэнээччилэрэ өбүгэ үгэһин утумнаан чабырҕах (сал. Дмитриева С.С.), уһуйаан иитиллээччитэ Артем Белолюбскай (сал. Готовцева С.И.) олоҥхо толордулар. Ураты түгэнинэн буолла саҥа тэриллибит ансаабыллар, квартеттар дойдубут туһунан ылбаҕай ырыалары толоруулара: «Баатаҕай киэһэтэ» (эр дьон ансаабыла, сал. Белолюбскай А.П.), «Дьол чорооно» («Ыаллыылар» квартет, сал. Готовцева М.А.), «Көрсүһүөххэ дуоһуйа» («Сандаар» бөлөх, сал. Ушницкая М.А.).
Бүттүүн Республика акциятыгар кыттыһан С.Ф. Сивцев аатынан норуот айымньытын киинигэр саха омук үҥкүүтүн, кылыһахтаах ырыатын самныбаттык түстээн оһуокайы тартылар: Таисия Тарасовна Аманатова, Августина Николаевна Березкина, Вера Иннокентьевна Троева, Вера Васильевна Степанова. Саха Республикатын үтүөлээх учуутала, Россия үөрэҕириитин туйгуна, Учууталлар учууталлара Вера Иннокентьевна оҕо-дьону үөрэтэн, эдэр ыччаттарга, аҕа саастаахтарга холобур буолан түөрт араас оһуокайы толордо. Кини толорутугар Уус-Алдан, Таатта улуустарын уонна түөлбэ оһуокайдарын олохтоохтор бары кэриэтэ кэрэхсии батыстылар.
Түмүккэ, тэрээһин күрэхтэрин кыайыылахтарыгар анал бэлэхтэр, кыттыылаахтарыгар туоһу суруктар туттарыннылар.
Үбүлүөйдээх тэрээһиннэр былаан быһыытынан салҕаналлар — күүрээннээх үлэҕэ түмсүөҕүн, төрөөбүт дойдуга тапталбыт уҕараабатын, киэн туттуоҕун биир сомоҕо буоларбытынан!
Иһитиннэриини бэлэмнээтилэр Сивцева В.П., Тарская Д,Р.

Добавить комментарий

Ваш адрес email не будет опубликован. Обязательные поля помечены *

Можно использовать следующие HTML-теги и атрибуты:
<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>