Сэтинньи – Байанай ыйа. Дэлэй астаах, хаһаастаах ый. Кыһын кэлиитэ дьон идэһэ өлөрөллөр, муҥхалыыллар, бултууллар. Сэтинньи- кыһыҥҥы ый буолар. Сэтинньигэ саас хайдах буолуон,эрдэлиэн дуу, хойутуон дуу быһаараллар. Сэтинньигэ тибии элбээтэҕинэ ,өҥ дьылы кэтэһэллэр.
Байанай ыйынан Байанай 2021 диэн үгэс буолбут күрэхпитин ыыттыбыт. Барыта 3 хамаанда кыттан, илин-кэлин түһүстүлэр. Түргэн-тарҕан туттуулаах эстафетаҕа, күүһү –уоҕу эрэйэр канатка, эриирдээх-мускуурдаах боппуруостарга уонна да атын барыта 7 этаптаах күрэххэ Степан Готовцев хамаандата кыайыаҕын кыайда.
Сомоҕолоһуу күнүн онлайн доҕотторбутун Партизан- Заболоцкай түмсүүнү кытта Эҕэрдэ кэнсиэринэн бэлиэтээтибит. Араас норуоттар үҥкүүлэригэр, көстүүмнэригэр конкурстарга 10 араас үҥкүү коллективтара, 20 араас көстүүмнээх оҕолор кытыннылар.
Үлэлээх буолуу ирдэбилинэн директор Готовцева Л.Р,специалистар Белолюбскай А.П, Лугинова Л.С улуус киинигэр Бороҕоҥҥо ОТ уонна ПБ икки күннээх үөрэххэ үөрэннилэр.
Сэтинньи 22 күнүттэн биир дойдулаахпыт Саха Республикатын культуратын туйгуна Сивцев С.Ф. төрөөбүтэ 70 сылыгар аналлаах Декада аһылынна. Декада чэрчитинэн киниэхэ аналлаах кинигэ тахсыытыгар Мүрү саһарҕата типографияны кытта үлэ бара турар.Семен Федорович сөбүлээн оонньообут көрүҥнэригэр остуол тиэниһигэр ,шахматка нэһилиэк олохтоохторугар күрэх ыытылынна. Олоҕун, үлэтин кэпсиир быыстапка декада устата турда.
Саха Республикатыгар профсоюзнай хамсааһын тэриллибитэ 100 сылыгар аналлаах онлайн мунньахтарга председатель Лугинова Л.С. кытынна . Культурабыт ветераннарын , үлэлии сылдьар коллективпытын видеонан эҕэрдэлээтибит.
