Кулун тутар 11 күнүгэр Баатаҕай нэһилиэгэр Өрөгөйдөөх Улуу Кыайыы 75 сылынан, 2022 сыллаахха Уус-Алдан улууһугар ыытыллар саха норуоттарын VIII-с спортивнай оонньууларын көрсө «Биир сомоҕо» улуустааҕы ыччаттар түмсүүлэрэ кэлэн биир күнү нэһилиэнньэҕэ туһалаахтык ыыттылар. Уус-Алдан улууһун араас тэрилтэлэрин эдэр на специалистара: ол курдук, улуус дьаһалтатын тутуу уонна архитектура управлениятын, предпринимательство отделларын специалистара, тыа хаһаайыстыбатын управлениятын, дьарыктаах буолуу тэрилтэтин уонна МФЦ «Мои документы» специалистара консультация оҥордулар, учуокка туруордулар. Уопсайа ааттаммыт специалистар өҥөлөрүнэн 22 олохтоох киhи туһанна.
Олохтоох ыччатын кытары тыыл ветераныгар Соловьева Прасковья Петровнаҕа тимуровскай үлэнэн көмөлөстүлэр, төгүрүк остуол тула аһаҕастык кэпсэттилэр. Баатаҕай нэһилиэгин ыччата улуус дьаһалтатын ыччакка уонна дьиэ — кэргэннэ политикатын отдела ыытар үлэтигэр кэккэ этиилэри киллэрдэ. Ол курдук, бастакытынан ханнык баҕарар нэһилиэк ыччата ыытар үлэтигэр оскуола уонна оҕо уһуйааннарын үлэһиттэрэ төһүү күүс буолалларын бэлиэтээн туран учууталлар, иитээччилэр хамнастарыгар эбилик стимулирующай чааhын ааҕыллыытын балаhыанньатыгар болҕомто ууралларыгар. Иккиһинэн, улуус ыччата түмүллэр араас хайысхалары хабан уопсай биир тэрээһинин тэрийии. Бу тэрээһин ыһыах эбэтэр фестиваль диэн ааттаммакка сайынны бириэмэҕэ уонна айылҕаны харыстыыр сыаллаах ыытыллара кэрэхсэнэр. Υсүһүнэн, үлэтэ суох олорор ыччакка самозанятость программанан анал квота көрүллэн, салҕыы улуус дьаһалтатын предпринимательство отделын уонна дьарыктаах буолуу тэрилтэтин истэринэн кинилэр үлэлээх, дьарыктаах буолууларыгар уонна кэмиттэн-кэмигэр араас үөрэхтэргэ ыытан күүстээх болҕомтону ууралларыгар. Төрдүһүнэн,дьиҥнээх патриот, нэһилиэктэрин, улуустарын туһугар туруулаһар ыччаты түмэн улуус ыччатын сэбиэтин тэрийэргэ.
Ирэ-хоро кэпсэтии кэнниттэн улуус ыччата нэһилиэнньэҕэ 2022 сылга диэри саха норуоттарын VIII-с спортивнай оонньууларын көрсө улууспутугар туох үлэлэр ыытыллалларын иһитиннэрдилэр, бигэргэммит проектары көрдөрдүлэр. Бу күнү эҕэрдэ кэнсиэринэн түмүктээтилэр.
